खबरकट्टा : चंद्रपूर : राजुरा -
पक्षाचा पराभव हा कार्यकर्त्यांचा पराभव असून पराभवाने खचून न जाता खोडंबलेली विकासगंगा ओढून आणण्यासाठी पुन्हा राजुरा विधानसभेला गतवैभव प्राप्त करून देण्याकरिता कार्यकर्त्यांनी वेगाने कामाला लागावे. तसेच येणाऱ्या विधानसभा निवडणूकांत भारतीय जनता पक्षाचा विजय व्हावा असा संकल्प करण्याचे आवाहन सुधीर मुनगंटीवार, मंत्री - वने, सांस्कृतिक कार्य तथा मत्स्य व्यवसाय यांनी ऍड. संजय धोटे यांच्या वाढदिवस अभिष्टचिंतन सोहळ्याप्रसंगी प्रतिपादन केले. यावेळी हंसराज अहिर यांच्या समवेत अनेक मान्यवरांनी ऍड. संजय धोटे यांना शुभेच्छा देताना आपले मनोगत व्यक्त केले.
जिल्हा सामान्य रुग्णालय, चंद्रपूर व उपजिल्हा रुग्णालय, राजुरा यांच्या संयुक्त विद्यमाने राजुरा विधानसभा क्षेत्राचे माजी आमदार ऍड. संजय धोटे यांच्या वाढदिवसा निमित्य दि. 28 फेब्रुवारी ला भव्य आरोग्य तपासणी व रक्तदान शिबीराचे आयोजन करण्यात आले तसेच विविध सामाजिक सेवाभावी संस्था, बचत गट यांचा सत्कार व ऍड. संजय धोटे यांची लाडूतुला कार्यक्रम संपन्न झाला. सेलीब्रेशन (नक्षत्र) हॉल चुनाळा रोड, राजुरा येथे या सर्व कार्यक्रमाचे आयोजन करण्यात आले होते.
या कार्यक्रमाचे अध्यक्ष हंसराज अहिर, राष्ट्रीय अध्यक्ष, इतर मागासवर्ग आयोग हे होते . तर कार्यक्रमाचे उद्घाटक म्हणून वने तथा मत्स्य व्यवसाय, सांस्कृतिक कार्यमंत्री सुधीर मुनगंटीवार हे होते. प्रमुख अतिथी म्हणून वन विकास महामंडळाचे माजी अध्यक्ष चंदनसिंह चंदेल, माजी जिल्हा परिषद अध्यक्ष देवराव भोंगळे, माजी आमदार सुदर्शन निमकर, राजुरा विधानसभा क्षेत्रातील राजुरा, कोरपना, जीवती, गोंडपिपरी या चारही तालुक्यातील भाजपा तालुका अध्यक्ष यांसह अनेक पदाधिकारी उपस्थित होते. कार्यक्रमाच्या सुरुवातीला दिपप्रज्वलन, लाडूतुला व राज्यगीत गायन करण्यात आले. राजुरा शहरातील अनेक महाविद्यालयीन विध्यार्थी, युवक, युवती, सामाजिक कार्यकर्ते यांनी उत्स्फूर्तपणे रक्तदान केले. रक्तदात्यांना आयोजका तर्फे प्रमाणपत्र व भेटवस्तू देऊन सन्मानित करण्यात आले. आरोग्य शिबिरात बालरोग तपासणी, रक्तदाब, मधुमेह, स्त्रीरोग तपासणी तसेच इतर आजारांची तपासणी करून त्यांना मोफत औषध वितरित करण्यात आले. या कार्यक्रमात सामाजिक क्षेत्रात भरीव योगदान देणाऱ्या समाजसेवी संस्थाचा सन्मान करण्यात आला. नवनिर्वाचित सरपंच, उपसरपंच व सदस्य यांचा सत्कार, महिला सक्षमीकरण, उल्लेखनीय योगदान देणाऱ्या महिलांचा सत्कार, उद्योजक व प्रगतिशील शेतकरी समूहांचा सत्कार, व्यसनमुक्ती कार्य करणाऱ्या व्यक्ती व संस्थांचा सत्कार ,राष्ट्रसंत तुकडोजी महाराजांच्या विचारांचे करणाऱ्या व्यक्ती व मंडळांचा सत्कार तसेच युवा टॅलेंट यांचाही सत्कार करण्यात आला. या कार्यक्रमाला चंद्रपूर जिल्ह्यातील ज्येष्ठ पदाधिकारी व सामाजिक कार्यकर्ते मोठ्या संख्येने उपस्थित होते.
या कार्यक्रमाचे सूत्रसंचालन प्राध्यापक बी.यु. बोर्डेवार यांनी केले तर प्रास्ताविक निलेश ताजणे यांनी केले. आभार राजुरा तालुका महामंत्री भाजपा दिलीप वांढरे यांनी मानले. या कार्यक्रमाच्या यशस्वीते करिता अविनाश जाधव,सतीश धोटे,गणेश रेकलवार,संदीप गायकवाड,राधेश्याम अडाणीया,महादेव तपासे,संदीप पारखी,रवि गायकवाड,तथा ऍड.संजय धोटे मित्र परिवार आयोजन समितीने अथक परिश्रम घेतले.
