खबरकट्टा/ नागपूर:
परिवहन विभागातील मोटार निरीक्षक महिलेच्या लैंगिक छळ प्रकरणात नागपूरचे प्रादेशिक परिवहन अधिकारी चांगलेच अडचणीत सापडले आहे. पीडितेच्या या आरोपाने परिवहन विभागात चांगलीच खळबळ उडाली आहे.
पीडितेच्या तक्रारीवरून परिवहन आयुक्तांनी तात्काळ महिला तक्रार निवारण मार्फत चौकशी करण्याचे आदेश दिले आहे. सदर महिलेचे आरोप बिनबुडाचे असून या चौकशीला मी सामोरं जाणार असे परिवहन अधिकारी रवींद्र भुयार यांनी प्रतिक्रिया दिली आहे.
रवींद्र भुयार हे नागपूर शहर परिवहन विभागाच्या प्रादेशिक परिवहन अधिकारी पदावर आहे.पीडित मोटार वाहन निरीक्षक महिलेने राज्याचे परिवहन आयुक्त विवेक भीमनवार यांच्याकडे लेखी तक्रार दिली आहे.
कार्यालयाचे वाहन असताना सुद्धा मला घरी सोडायला सांगतात, आपण सोबत लॉंग ड्राईव्ह ला जाऊ, घरी आले की उशिरापर्यंत बसतात, मी काही बोलले की लाचलुचपत विभागाकडे खोटी तक्रार देणार असे धमकवीत असतात, रात्री अपरात्री फोन करून मला त्रास देतात, याबाबत मी पतीला सुद्धा सांगितले आहे.9 जानेवारीला माझ्या भावाने परिवहन कार्यालय गाठत भुयार यांना जाब विचारला असता त्यांनी पुन्हा असे करणार नाही सांगत माफी मागितली होती मात्र त्यानंतर सुद्धा हा प्रकार सुरूच होता.
