🍷आता किराणा दुकानात मिळणार वाईन...?#wine

खबरकट्टा /न्युज डेस्क : 

राज्य सरकारने मध्यंतरी वाइनवर १० रुपये प्रति लीटर अबकारी कर जाहीर केला. परंतु आता त्यानंतर आणखी एक वृत्त वाईनसंदर्भात आले आहे.

आता यापुढे वाईन किराणा दुकानात देखील मिळू शकते. वाचून आश्चर्य वाटले ना? पण हे होण्याची शक्यता आहे.

जीवनावश्यक वस्तू विकणाऱ्या या दुकानांमध्ये येणाऱ्या काळात वाईन विक्री करण्यास राज्य सरकार परवानगी देण्याची शक्यता आहे. ठाकरे सरकार याबाबत अधिसूचना काढण्याच्या तयारीत आहे.

बहुतेक मद्याच्या तुलनेत वाईनमध्ये अल्पप्रमाणात अल्कहोल असतं. त्यामुळे सरकार हा निर्णय घेण्याची शक्यता आहे.

तसेच, मोठ्या संख्येने रेस्टॉरंट आणि बेकरी स्वादिष्ट पदार्थ बनवण्यासाठी वाइन वापरतात. २००० पासून, द्राक्ष शेतकरी बाजार आणि देशांतर्गत वाइन निर्मात्यांना प्रोत्साहन देण्यासाठी वाइनवर कोणताही कर नाही,

तर त्यापूर्वी कर खूपच कमी होता. नवीन कर लागू केल्याने राज्याला केवळ ५ कोटी रुपयांचा महसूल मिळणार असला तरी, उत्पादन शुल्क प्रशासनाला बाजारात विकल्या जाणार्‍या वाईनच्या बाटल्यांवर लक्ष ठेवण्यास मदत होईल,असे मुख्य उत्पादन शुल्क सचिव वल्सा नायर सिंह यांनी म्हटले आहे. ३१ डिसेंबर जवळ आलेला असताना राज्य सरकार हा महत्त्वपूर्ण निर्णय घेऊ शकतात. त्यामुळे किराणा दुकानं, बेकरी, डिपार्टमेंटल स्टोअरमध्ये वाईन विक्री होऊ शकते.

मात्र ही वाईन खरेदी करताना एक लीटर वाईनवर १० रुपये अबकारी कर आकारण्यात येणार आहे. त्यामुळे राज्य सरकारच्या तिजोरीत ५ कोटींचा महसूल जमा होणार आहे.

त्याचसोबत वाईनची किती विक्री होते याचीही नोंद सरकारला मिळणार आहे. राज्यात दरवर्षी ७० लाख वाईन बॉटलची विक्री होते परंतु सरकारच्या या धोरणामुळे दरवर्षी १ कोटी वाईन बॉटल विक्री होईल अशी आशा आहे.

राज्य उत्पादन शुल्कने अलीकडेच व्हिस्कीसारख्या आयात केलेल्या मद्यावरील शुल्क पूर्वीच्या 300 टक्क्यांवरून 150 टक्के कमी करण्याचा मोठा निर्णय घेतला आहे.