खबरकट्टा / चंद्रपूर :
वीजनिर्मिती केंद्रासाठी जमिनी संपादन केलेल्या प्रकल्पग्रस्तांची यादी महानिर्मितीच्या पातळीवर ठेवण्यात येते तसेच महानिर्मिती मधील तंत्रज्ञ पदाच्या भरतीसाठी या उमेदवारांना ५० टक्के जागा राखीव ठेवल्या जातात. तथापि, या उमेदवारांना लवकरात लवकर नोकरीची संधी मिळावी यादृष्टीने महानिर्मिती, महावितरण तसेच महापारेषण या तिन्ही कंपन्यांनी सामावून घेण्यासाठी प्रस्ताव तयार करून एमएसईबी सूत्रधारी कंपनीकडे सादर करावा असे निर्देश ऊर्जामंत्री नितीन राऊत यांनी केले. याबाबतच्या मागील अनेक वर्षांपासून खासदार बाळू धानोरकर, आमदार प्रतिभाताई धानोरकर पाठपुरावा करीत आहेत. त्यांच्या मागणीनुसार मंत्रीमहोदयांनी मुंबई येथे बैठक बोलावून हे निर्देश दिले.
यावेळी खासदार बाळू धानोरकर, आमदार प्रतिभाताई धानोरकर, आमदार सुभाष धोटे, आमदार सरोज अहिरे, ऊर्जा विभागाचे प्रधान सचिव दिनेश वाघमारे, महानिर्मितीचे अध्यक्ष व व्यवस्थापकीय संचालक संजय खंदारे यांच्यासह महानिर्मिती, महावितरणचे अधिकारी आदी उपस्थित होते.
यावेळी डॉ. नितीन राऊत म्हणाले कि, तीन वीज कंपन्यांच्या निर्मितीपूर्वी महाराष्ट्र राज्य विद्युत मंडळाने वीज प्रकल्पाच्या उभारणीसाठी जागा घेतलेल्या प्रकल्पग्रस्तांना काही सेवा सुविधा देण्यासंदर्भात करार केले होते. त्यामध्ये प्रकल्पग्रस्तांना नोकरी देण्याबाबत निश्चित करण्यात आले होते. बहुतांश जागा विद्युत निर्मिती केंद्रासाठी संपादित असल्याने तीन कंपन्यांच्या निर्मितीनंतर या पकल्पग्रस्तांना नोकरी देण्याची संपूर्ण जबाबदारी महानिर्मितीवर सोपवण्यात आली. परंतु आता नोकरी देऊन शिल्लक राहिलेल्या उमेदवारांना लवकरात लवकर नोकरी देणे आवश्यक असून त्यासाठी त्याचे शैक्षणिक पात्रतेनुसार महावितरण तसेच महापारेषण या इतर वीज कंपन्यांमध्येही समावेश करणे आवश्यक आहे. त्यादृष्टीने तिन्ही कंपन्यांनी सविस्तर प्रस्ताव तयार करून एमएसईबी होल्डींग कंपनीकडे सादर करावा त्याबाबत सकारात्मक निर्णय घेण्यात येईल, असेही डॉ. राऊत म्हणाले.
महानिर्मितीकडे नोकरीसाठी ९ हजार ९५१ प्रकल्पग्रस्त उमेदवार होते. त्यापैकी ६ हजार ८०० उमेदवारांना शैक्षणिक पात्रतेनुसार नोकरीत सामावून घेण्यात आले. आता ३ हजार ७६ उमेदवारांना नोकरी देणे शिल्लक आहे. सध्या महानिर्मितीकडे तंत्रज्ञ पदाच्या ११०० जागा रिक्त असून त्यापैकी ५५० जगावर प्रकल्पग्रस्तांना सामावून घेता येईल असे महानिर्मितीच्या संचालक पुरुषोत्तम जाधव यांनी यावेळी सांगितले.
