खबरकट्टा/चंद्रपूर :
प्राप्त माहितीनुसार, चंद्रपूर (वरोरा) वर्धा (हिंगणघाट ) सीमेवरील पोतरा नदीपात्रात काल शनिवारी सायंकाळच्या सुमारास नर जातीचा वाघ मृतावस्थेत असल्याची माहिती वरोरा व हिंगणघाट येथील वनविभागाला मिळाली. ज्या ठिकाणी वाघ मृतावस्थेत आढळला ती जागा वनपरिक्षेत्र हिंगणघाटच्या अखत्यारीत आहे की वरोऱ्याच्या, असा संभ्रम बराच वेळ निर्माण झाल्याने वनाधिकाऱ्यांना घटनास्थळी पोहोचणे बराच उशीर झाला. या विषयावर बराच खल झाल्यानंतर घटनास्थळ वरोरा वनपरिक्षेत्रात असल्याचे निश्चित झाल्यानंतर वर्धा व वरोरा वनपरिक्षेत्रातील कर्मचाऱ्यांनी घटनास्थळी पोहोचले आणि संयुक्त पंचनामा केला.
घटनास्थळ मुख्य मार्गावरून आत असल्याने वाघाला तिथून काढण्यासाठी बरीच कसरत करावी लागली. शेवटी, रात्री उशिरा शवविच्छेदनाकरिता मृत वाघ टीटीसी, चंद्रपूरला रवाना करण्यात आले. वाघ नदीपात्रात मृतावस्थेत आढळून आल्याने सदर प्रकरणाविषयी वेगवेगळ्या चर्चांना ऐकायला मिळत आहेत. काहींच्या मते ' करंट' लागल्याने वाघ थोडे अंतर चालून नदीपात्रात पडला व तिथेच मरण पावला, तर अन्य व्यक्तींच्या मते वाघ अज्ञात स्थळी मेला व नंतर त्याला नदीपात्रात फेकण्यात अशी ही चर्चा ऐकायला मिळत आहे. शवविच्छेदनाच्या अहवालानंतरच वाघाच्या मृत्यूचे गूढ उलगडण्याची शक्यता आहे. पुढील तपास सहायक वनसंरक्षक निखिता चौरे यांचे मार्गदर्शनात वनपरिक्षेत्र अधिकारी सतीश शेंडे. वनरक्षक नेवारे. केजकर करीत आहे.
