🐯वाघाच्या हमल्यात युवक ठार.. #wild-attack

खबरकट्टा / चंद्रपूर : 

जंगलात बकर्‍या चराईसाठी गेलेल्या युवकावर वाघाने हल्ला करून ठार केले. ही घटना बुधवार, 2 डिसेंबर रोजी दुपारच्या सुमारास उघडकीस आली. सुजत श्रीकृष्ण नेवारे असे मृतक युवकाचे नाव असून, तो केमारा येथील रहिवासी आहे. 

पोंभुर्णा तालुक्यातील केमारा हे गाव जंगलव्याप्त आहे. या गावातील सुजत नेवारे हा युवक बकर्‍या चराईसाठी जंगल परिसरात गेला होता. तेथे दबा धरून बसलेल्या वाघाने सुरूवातीला बकर्‍यांवर हल्ला केला. बकर्‍यांना वाचविण्यासाठी सुजत धावून गेला असता, वाघाने त्याच्या नरडीचा घोट घेतला.

दरम्यान, अन्य गुराख्यांनी याबाबतची माहिती गावकर्‍यांना दिली. गावकर्‍यांनी ही माहिती वनविभागाला दिली. वनविभागाच्या चमुने घटनास्थळ गाठून पंचनामा केला. घटनेचा तपास कोठारी पोलिस व वनविभाग करीत आहेत. मृतकाच्या पश्‍चात पत्नी, दोन मुले असा बराच मोठा आप्तपरिवार आहे.