५० हजारांची लाच स्वीकारताना पळसगाव उपक्षेत्राचा वनपाल एसीबीच्या जाळ्यात - Khabarkatta ✒ खबरकट्टा

                     Khabarkatta  ✒ खबरकट्टा

Reg.UAM No.MH08D0024084 खबरकट्टा फक्त न्यूज वेबसाईट नसून या माध्यमाच्या साहाय्याने सामाजिक, राजकीय, व्यासायिक, जाणिवेतून फक्त बातमी किंवा खबर याच्याही पलीकडे जाऊन जनमानसांना खंबीर उभे राहण्याचे सामर्थ्य देणारे व्यासपीठ - अभिषेक वांढरे, चंद्रपूर (एक वाचक) """जागरूक रहा : वाचत रहा""'

५० हजारांची लाच स्वीकारताना पळसगाव उपक्षेत्राचा वनपाल एसीबीच्या जाळ्यात

Share This
खबरकट्टा / गडचिरोली :आरमोरी प्रर्तीनिधी -


रोपवाटिकेतील मातीकामाचे देयक मंजूर करण्याकरिता शेतकऱ्याकडून ५० हजार रुपयांची लाच स्वीकारताना काल (दि.४) आरमोरी वनपरिक्षेत्रांतर्गत पळसगाव उपक्षेत्राचा वनपाल विकास उद्धवराव मेश्राम (५७) यास लाचलुचपत प्रतिबंधक विभागाच्या अधिकाऱ्यांनी रंगेहाथ पकडून अटक केली.

तक्रारकर्ता हा शेतकरी असून,जोगीसाखरा येथील रहिवासी आहे. तक्रारकर्त्याने रोपवाटिकेत खोदलेल्या खड्ड्यांजवळ मातीकाम केले होते. त्या कामाचे १ लाख ४० हजार रुपये मिळण्याकरिता त्याने पळसगाव उपक्षेत्र कार्यालयाकडे देयक सादर केले. शिवाय वनपाल विकास मेश्राम याचीही भेट घेतली. परंतु मेश्राम याने तक्रारकर्त्यास्‍ ५० हजार रुपयांची लाच मागितली.



परंतु लाच देण्याची मुळीच इच्छा नसल्याने तक्रारकर्त्याने लाचलुचपत प्रतिबंधक विभागाकडे तक्रार केली. त्यानुसार काल या विभागाच्या अधिकाऱ्यांनी सापळा रचला. यावेळी वनपाल विकास मेश्राम यास पंचांसमक्ष तक्रारकर्त्याकडून ५० हजार रुपयांची लाच स्वीकारताना रंगेहाथ पकडण्यात आले. त्याच्यावर भ्रष्टाचार प्रतिबंध अधिनियम १९८८ (संशोधन २०१९) च्या कलम ७ नुसार आरमोरी पोलिस ठाण्यात गुन्हा दाखल करण्यात आला आहे.

लाचलुचपत प्रतिबंधक विभागाच्या पोलिस अधीक्षक रश्मी नांदेडकर, अपर पोलिस अधीक्षक राजेश दुद्दलवार यांच्या मार्गदर्शनात पोलिस उपअधीक्षक सुरेंद्र गरड, सहायक फौजदार मोरेश्वर लाकडे, हवालदार प्रमोद ढोरे, शिपाई सतीश कत्तीवार, महेश कुकुडकार, तुळशीराम नवघरे, घनश्याम वडेट्टीवार यांनी ही कारवाई केली.