खबरकट्टा / चंद्रपूर :भद्रावती -
भद्रावती शहराच्या उत्तर दिशेला चंदनखेडा मार्गावर सुमारे ७ किमी अंतरावर असलेल्या मांगली (रै.) शिवारात शुक्रवार दि. २७ डिसेंबर ला ८.३० वा. रात्रीच्या सुमारास अस्वलीने १३ दिवसानंतर पुन्हा मुक्काम ठोकला आहे.
हिच अस्वल दि. १५ डिसेंबर रोजी या गावाच्या शेत शिवारात दिसून आली होती. दि. २७ डिसेंबर रोजी मांगली (रै.) गावाच्या पूर्वेला लोकवस्तीला लागूनच असलेल्या अजय पिंपळकर यांच्या शेतात अस्वलीने पुन्हा बस्तान मांडून शेतातील मधुमक्षिका पेट्यांचे पुन्हा नुकसान केले. यापूर्वी सुध्दा त्यांच्या मधुमाक्षिका पेट्यांचे नुकसान अस्वलीने केले होते.
मांगली (रै.) या गावातील शेतकरी अजय पिंपळकर गेल्या पाच वर्षापासून मधुमक्षिका पालन व्यवसाय करीत आहे. अस्वलीने त्यांच्या शेतातील आता पर्यंत दोन मधुमक्षिका पेटीचे नुकसान केले आहे. यामुळे त्यांचे सुमारे सोळा हजाराचे नुकसान झाले आहे. त्यांनी शुक्रवारला उर्वरीत सर्व मधुमाक्षिका पेट्या घरी आणल्या आहे. या शिवारात अस्वालीचा वावर वाढल्याने त्यांच्या मधुमक्षिकेच्या इतर पेट्यांना नुकसान होण्याची शक्यता बढावली आहे.
